Leonard Trebicka
Kroati Marko Radas është cilësuar si një nga mbrojtësit më të mirë të kampionatit shqiptar dhe për të ka pasur oferta të ndryshme gjatë merkatos. Por, siç e thotë vetë mbrojtësi, nuk është paraja gjithçka. Ai ndihet shumë komod me Skënderbeun, që e konsideron skuadrën më të mirë. Radas ka dalë dje në sallën e konferencave për shtyp, në orën 17:30, pasi ishte caktuar nga trajneri Mirel Josa të fliste për ndeshjet e Championsit. Kroati ka folur edhe atë që e bindi të qëndronte edhe për një sezon te Skënderbeu. Ja dhe intervista e plotë e Radasit:
– Radas, Vetëm tri ditë na ndajnë nga sfida me Krusejdërs në Champions. Si e prisni?
– Mendoj që jemi ekip më i mirë se Krusejdërs, por duhet ta tregojmë edhe në fushë. Nuk them që jemi superiorë, pasi janë 180 minuta për tu luajtur, por e them me bindje se jemi ekip më i mirë në çdo aspekt.
– Sa të vështirë janë irlandezët?
– Nuk ka sot ekipe të lehta. Ata janë kampionë në vendin e tyre dhe normalisht që janë të vështirë. Sikundër e thashë edhe më lart, mendoj se jemi ekip më i mirë, por gjithçka duhet ta demonstrojmë në fushë.
– Me këtë grup që ka Skënderbeu, mund t’ia dalë?
– Mendoj se duhet të ecim avash-avash, hap pas hapi. Sigurisht që do t’ia dalim. Besoj se e kalojmë Krusejdërsin dhe kjo është e rëndësishme.
– Ndeshjen e fundit europiane ishit ju që shënuat, por ekipi nuk u kualifikua…
– Nuk e dua golin personal, por kualifikimin. Bëmë dy ndeshje të mëdha verën e kaluar, por na ndëshkoi goli i pësuar në fushën tonë. Këtë herë nuk do të bëjmë gabimet e viteve të fundit, që na kanë penalizuar për kualifikimin.
– Mund ta siguroni që në Korçë kualifikimin?
– Për të mirën tonë duam ta mbyllim që këtu. Shpresoj që kështu të jetë.
– Janë bërë përfocime në mesfushë dhe në sulm. Mbrojtja nuk kishte nevojë?
– Besoj se Salihi dhe Hristov janë dy afrime shumë cilësore. Sidomos Salihi, që i jep ekipit eksperiencë të madhe, por edhe Hristov plotëson sulmin dhe na jep sigurinë e munguar vitin e fundit të repartin ofensiv. Mbrojtja është kompakte dhe e plotësuar.
– Përse rinovuat me Skënderbeun?
– Sepse mendova se Skënderbeu do të jetë ekipi më i fortë edhe për shumë vjet. Nga ana tjetër, klubi ka qenë shumë korrekt me mua. Jemi më të mirët në Shqipëri. Më pëlqen këtu dhe do të bëj histori si i huaji i vetëm, i cili ka luajtur kaq gjatë në Korçë.
– A është e vërtetë që Flamurtari ju ka bërë një ofertë të majme?
– Po, shumë e vërtetë. Ishte një ofertë shumë e mirë financiare dhe e falënderoj për këtë ofertë, por nuk është paraja gjithçka. Zgjodha atë që më thoshte zemra dhe ekipin më të mirë.
– A shkon ky ekip deri në fazën e grupeve?
– Do ta shikojmë. Do të ecim ndeshje pas ndeshjeje dhe besoj se do t’ia dalim për të qenë në Europa League, pasi në Champions është shumë e vështirë. Gjithsesi, mrekullitë ndodhin.
– A është kampion ende pa nisur kampionati ky Skënderbe?
– Besoj se po. Kemi elementët më të mirë të mundshëm, duke nisur nga grupi që është ruajtur, por edhe nga afrimet e reja. Hristov është një lojtar shumë i mirë, po ashtu edhe Abilaliaj. Jemi kampionë.
– Çfarë do t’u thoshit tifozëve korçarë?
– U them që të na mbështesim, si kur luajmë mirë, ashtu edhe kur luajmë keq. Duam mbështetje maksimale nga ata, pasi bashkë jemi më të fortë.
4 sezone
ka në Korçë kroati Marko Radas. Ai është shpallur 4 herë kampion dhe është një nga lojtarët më të mirë të kampionatit. Tani synon titullin e radhës me Skënderbeun në sezonin e 5-të.